《移民入藉要通過CIPLE A2葡文試》 由於申請葡國國藉，必須通過 CIPLE 語文考試，又或者在政府認可機構完成相等程度嘅 A2 課程，故此絕對建議有意移民的人，在未移居葡國之前已經開始學習葡文，打好基礎。在澳門可以去 IPOR 上堂，已及可以在 IPOR 考 CIPLE 試。而香港人，可以參考 #葡萄牙語在香港 的 FB page，佢地嘅導師呂 sir 非常熱心教學，極力推薦！
《葡國各種語文班：優點vs缺點》 而搬到葡國之後，仍然需要上語文班，因為無論你學得幾好，仍然同本地人有好大差距，要適應本地人嘅口音和速度，真係絕非易事。今次介紹一下葡國各種語言班嘅優點缺點。
里斯本大學：首先有由大學開設嘅葡文班，喺里斯本，主要有 Universidade de Lisboa (里斯本大學)和 Universidade NOVA de Lisboa (里斯本新大學)兩間。有上、下學期各四個月嘅日間或夜間課程，亦有暑期一個月密集式課程。日間課程比較多年青人就讀，唔少係來葡國留學嘅學生，夜間課程比較多返工一族。通常係一星期兩堂。暑期課程會喺一個月之內極速哽完成個學期嘅教材，週一至五日日都上堂，令我覺得進度太快，消化不良。但好處係日日都需要聽和講，會迫使你進步。Universidade de Lisboa 嘅課程比較多人報，每班大約有二十幾人，而且唔少中國大陸學生。而 NOVA 嘅人數稍為少啲，大約十至十五個人左右，暑期班更加有啲參觀、聯誼嘅遊戲活動等等，會比較容易識倒朋友。
私人語言班：其次有唔少私人開嘅語言班，稍為搜尋吓，就會搵到一大堆。通常呢啲私人學校會係單對單或者小班教學，學習環境較佳，但價錢不菲。
政府語言班：而政府亦有極為廉價嘅語言班提供俾新移民，15€ 整個兩學期嘅課程，在各社區學校開辦嘅夜校上課。有關課程嘅資料可以在 CNAI (Centro Nacional de Apoio ao Imigrante 新移民服務中心) 查詢，在 ACM (Alto comissariado para as migrações 移民政策局)的網頁亦可以搵得到。呢啲班每星期會上三堂，每班人數極多，三十人或以上，會有唔少係尼泊爾、印度和中國人。老師唔會有機會照顧不同程度嘅學生，教學的質素較差，但勝在價錢廉宜。而且呢啲課程係政府認可，即係話，讀完成個課程，出席率八成以上，在學期末考試合格的話，已經等同A2 程度，可以豁免CIPLE考試。
義工組織：除此之外，義工組織 SPEAK 亦有開辦葡文課程，但其課程只分 Beginner 和 Conversational 兩個程度，兩個程度差距極大，而且老師皆為義工，並無教學經驗。SPEAK 亦鼓勵參與嘅外國人開班，教返自己嘅語言。故此 SPEAK 未必可以好系統咁教學生任何嘢，但可以幫倒你增加聆聽同講嘅機會。
Meetup：語言班往往係認識新朋友嘅好開始。除此之外，喺一啲網站，例如 Meetup.com，亦有一啲群組有定期嘅語言交流活動，值得一試。
Comments