葡國的郵政和關稅 貴到你呢⋯⋯💀 移民其中一樣考慮係如何搬嘢過來葡國。但有一件事要留意嘅就係關稅。無論係網上購物，定係運送私人物件，只要係從非歐盟國家入口，都會要求寄送人報單，按照單據打關稅。而歐盟區嘅關稅係非常重，平均23%，但部份物品係有懲罰性關稅，最高可達48.5%。假如有傢俬、貴重物件你覺得必須帶去葡國，你可以選擇去澳門葡國領事館申請「個人物品證明書」，證明係因為移民需要，係私人用途，價值多少等等。
留意葡國海關，搶錢式關稅！💰 筆者就試過寄一箱私人物品，因為冇單，亦怕領事館辦手續需要很長時間，結果唯有自己估計價值150€，結果被海關(Alfândega)扣留咗成個月先至收到通知，要親身去郵政總局繳交關稅，而最終收咗我60€ 重稅。
海關 Alfândega，我的慘痛經驗🤦🏻♂️ 里斯本海關 Alfândega 位置在 Cabo Ruívo 的郵局分發站，距離地鐵站十五分鐘，交通頗為不便，等候時間極長，可以等成日，而且服務態度惡劣。只要睇吓 Google map 的評價，你就發現原來連本地人都極之痛恨海關嘅官僚作風，而且海關打嘅稅項多少根本上非常隨意。故此建議大家，若非必要，實在不宜郵寄物品到葡國，寧願每次搭飛機帶少少個人物品。
葡國寄嘢返香港，不同類別託運選擇✈️🚢 而由葡國寄嘢返香港或澳門，當然可以選用葡國郵局 CTT (Correios) 嘅服務，你會發現郵局有不同嘅服務，Correio Verde (綠色)為一般固定大小的包裹，Correio Azul (藍色)為快遞，亦可以選擇掛號 Registado (紅色)方便追蹤郵件，以及 Avião Priority (空運優先郵件)。但要有心理準備，即使選擇空運優先郵件，寄往亞洲仍然往往需要一至兩星期，藍色快遞更有時需要三至四星期。如果真係急事，寧願選擇 DHL, UPS 等等速遞公司，但當然價值不菲。
參考葡國領事館網站「個人物品證明書」： https://www.cgportugal.org/cn/certificados
葡國郵局 CTT 網頁介紹不同郵件分類： https://www.ctt.pt/…/enviar-corr…/opcoes-de-envio/index.html
Comments