🇵🇹 葡萄牙年尾回顧和🇪🇺 2019歐洲的一些危機(上)
又到年尾，係時候回顧一下2018年，以及展望2019年的國際形勢。
1️⃣葡國經濟發展放緩，中國資金進入
🔎2017-18年間，葡國經濟穩步向上，旅遊業暢旺以及新移民增加，樓價急升。葡國開始喺某啲區域限制短租牌照(alojamento local)數量，以及推出新一批居屋(habitação social)幫助低收入人士上樓。但估計 2019 年起，葡國經濟發展將會放緩，因為好多基建跟唔上發展步筏，機場飽和、巿區交通擠擁、旅遊配套跟唔上，葡國發展已經去到一個樽頸位。
🔎十二月初習近平訪葡，中國公司在之前已經收購咗葡國電力EDP，日後更將投資CP(火車公司)和 Sines 貨櫃碼頭，而小米手機亦已經打入葡國巿場。中國資金雖然會幫助到葡國建設，但肯定會帶來好多後遺症。觀乎葡國傳媒報導，無論葡國政府或傳媒，都一面倒歡迎中國投資，似乎對中國企圖控制重要基建毫無警惕。但其實習近平包起成間酒店，出巡要封路，財大氣粗的表現，已經開始惹來一般葡國人反感。
🔎英國、德國、美國都唔希望見到西班牙、葡萄牙向中國靠攏。但大家要明白葡國一向有中立嘅傳統，在二戰時期，葡國係中立國，兩面逢緣，一方面容許納粹德軍進入葡國本土，但同時將阿速爾群島交畀英美作為基地。葡屬澳門一方面容許日本軍隊搜購物資，另一方面暗中容許英軍服務團建立情報站。故此，美國雖然希望中美貿易戰期間，歐盟各國歸邊，但葡國似乎繼續保持呢種中立政策。
2️⃣ Brexit 有啲人攞葡國護照，但其實目的係想移民英國、愛爾蘭等英語系國家。假如有葡國護照而想移居英國的話，就要喺明年三月 Brexit 之前決定，英國已承諾在明年三月之前已經居於英國的歐盟人士可以繼續居留。但三月之後，無論 Hard/soft Brexit，歐盟國家人士將會需要簽証去英國居住或工作，英國人亦同樣需要簽証在歐盟居住或工作。但要知道， Brexit 令英國的政治和經濟前景非常不明朗，北愛爾蘭嘅邊境問題猶其棘手，無論文翠珊嘅Brexit方案最終能否通過，會唔會重新公投等等，都會帶來英國社會動盪。相對來講，葡國即使在經濟衰退嘅時候，都仍然相對和平同安全，呢方面亦需要考慮。
3. 歐洲債務危機重現 大家如果有留意嘅話，幾乎每十年會出現一次經濟崩潰。2008 年雷曼事件引發全球經濟大衰退，而導致之後幾年歐洲債務危機，要去到大約 2015 年先至開始陸續復甦。但近來開始多報導，意大利的國債出現問題，波蘭、匈牙利、希臘、西班牙仍然國債比例太高，呢個將會係新一輪歐洲經濟危機嘅觸發點。法國近來因為增加燃油稅引發大規模黃背心示威，亦顯示法國社會中產及低收入人士對社會不公平嘅情況不滿大爆發，而呢個運動有擴展嘅趨勢，比利時、荷蘭都有人示威。葡萄牙今年亦有因居住，共享車輛及教師薪酬之示威活動。
4. 極右政黨抬頭
近幾年，主要因為難民問題，導致各國極右政黨開始抬頭。雖然今年關於難民嘅負面新聞減少，但各國都開始收緊難民政策，近來丹麥在來往德國邊境以及來往瑞典 Malmö 的大橋都設置臨時邊境檢查，主要原因係想監察難民嘅出入境。丹麥政府表示會將國內嘅難民送去孤島隔離。
但各國極右政黨的訴求其實好唔同，有啲著眼點在於想減少歐盟嘅控制，希望能夠控制自己國家的邊境關卡、關稅等等，亦有啲例如西班牙的極右政黨則更著眼於加強自己國家內部嘅「統一」，希望壓制卡塔隆尼亞等地區嘅分離主義。相對來講，葡國暫時仍然未有極右政黨抬頭嘅情形。
5. 溫室效應對歐洲影響 近年歐洲夏天熱浪嘅日子越來越長。今年葡國中部山區氣溫曾經一度升至最高50度。較北方如英國，亦有一個星期35度或以上。2017 年葡國山火曾經延綿四個月以上，造成60多人死亡。2018年竟然輪到北歐瑞典出現山火。溫室效應亦令葡國越來越乾旱，雨季縮短，農業減產。有專家認為撒哈拉沙漠將會伸延到西班牙、葡萄牙南部。溫室效應亦令季候風加劇。季候風沿自加勒比海和大西洋，通常係秋冬季吹到歐洲西岸，會造成英國及北歐大風雪。另外，雖然歐洲各國都積極推廣再生能源、電動車等等，但各國都未能達到巴黎環保協議嘅減碳標準。
早前葡萄牙既巴士公司Carris用Menos Carros, Mais Carris(減少汽車,坐更多Carris)做口號希望更多人使用公共交通公具
Comments